કેવી રીતે ?

કેવી રીતે ?

માત્ર ભીંતો, છત, ફરસ થી ઘર બને કેવી રીતે ?
પ્રેમ ના ચણતર વિના સધ્ધર બને કેવી રીતે ?

હું દિવાલો ને હંમેશાં આંગળાં થી ખોતરું
ને કાંકરા ઓ આંગળે જડતર બને કેવી રીતે ?

ચાતરેલા એ જ ચીલા પર અગર ચાલ્યા કરું,
તો પછી રસ્તો કોઇ નવતર બને કેવી રીતે ?

ના, મને એ વાતની ચિંતા નથી, હું બુંદ છું,
પણ વિચારું બુંદ નો સાગર બને કેવી રીતે ?

હું સતત અવહેલના ના નાગ પંપાળ્યા કરું,
તો પછી "આનંદ" નો અવસર બને કેવી રીતે ?

-અશોક જાની